நீங்கள் தேடியது "வனத்துறை ஊழியர் பலி"

கூடலூர்:

கேரள மாநிலம் குமுளி ரோஜாப்பூ கண்டத்தை சேர்ந்தவர் சந்திரசேகரன் மகன் சரத்குமார் (வயது22). இவர் கேரள வனத்துறையில் தற்காலிக ஊழியராக பணியாற்றி வந்தார்.

அதே பகுதியை சேர்ந்த நண்பர் தாஜூதீன் என்பவருடன் கம்பத்திற்கு பைக்கில் வந்தனர். வேலை முடிந்து 2 பேரும் மீண்டும் குமுளிக்கு திரும்பிக் கொண்டிந்தனர்.

குமுளி தேசிய நெடுஞ்சாலையில் பகவதியம்மன் கோவில் அருகே சென்றபோது சாலையோரம் நிறுத்தப்பட்டிருந்த சரக்கு வாகனம் மீது பைக் பயங்கரமாக மோதியது. இதில் தூக்கி வீசப்பட்ட சரத்குமார் சம்பவ இடத்திலேயே பலியானார். படுகாயம் அடைந்த தாஜூதீனை அக்கம் பக்கத்தினர் மீட்டு ஆஸ்பத்திரிக்கு கொண்டு சென்றனர்.

ஆனால் அவரும் வழியிலேயே பரிதாபமாக உயிரிழந்தார். இது குறித்து லோயர்கேம்ப் போலீசில் புகார் அளிக்கப்பட்டது. இன்ஸ்பெக்டர் சுரேஷ்குமார் தலைமையில் போலீசார் வழக்குப்பதிவு செய்து விசாரணை நடத்தி வருகின்றனர்.

கூடலூர்-குமுளி தேசிய நெடுஞ்சாலையில் விபத்துக்கள் தொடர்ந்து வருகின்றன. சாலை விதிகளை மீறி அதிவேகமாக செல்வதால் விபத்துக்கள் ஏற்படுகின்றது. மேலும் சில இடங்களில் குறுகலான வளைவு உள்ளது.

இது தெரியாமல் வேகமாக செல்லும் வாகன ஓட்டிகள் விபத்தில் சிக்கி வருகின்றனர். கடந்த ஒரு மாதத்தில் மட்டும் 4 பேர் சாலை விபத்தில் உயிரிழந்தது குறிப்பிடத்தக்கது. எனவே போலீசார் ரோந்து பணியில் ஈடுபட்டு அதிவேகமாக செல்லும் வாகனங்களை கண்காணிக்க வேண்டும் என அப்பகுதி மக்கள் வலியுறுத்தி உள்ளனர். #tamilnews